Shtyhet për të dytën herë seanca paraprake ndaj deputetit demokrat, Asllan Dogjani. Ky i fundit ka paraqitur në seancën e sotme një raport mjekësor për gjendjen e tij, çka ka sjellë shtyrjen e seancës në Gjykatën e Posaçme të Krimeve të Rënda (GJKKO).
Seanca e re është caktuar për datën 10 janar 2025.
Asllan Dogjani akuzohet nga SPAK për veprën penale të “deklarimit të rremë të pasurisë”. Hetimi i SPAK ka zbuluar se deputeti ka blerë një apartament në Tiranë me vlerën 121.980 euro në para cash, ndërkohë që në deklaratën e pasurisë që ka bërë në ILDKPI (Inspektoriati i Lartë i Deklarimit të Pasurisë dhe Kontrollit të Konfliktit të Interesave), ka deklaruar se e ka përfituar atë përmes konsulencave juridike që ka dhënë si avokat.
SPAK thotë se Dogjani ka paguar apartamentin me para cash, bazuar në një kontratë të gjetur mes tij dhe firmës së ndërtimit ‘Protial’ në shtator 2006, e cila tregon se deputeti kishte rënë dakord ta paguante apartamentin nëpërmjet pagesave cash.
Gjithashtu, SPAK ka theksuar se kontrata fillestare e datës 6 shtator 2006 është ndryshuar në mënyrë fiktive për të fshehur burimin e të ardhurave të deputetit Dogjani. Ky ndryshim i kontratës, sipas SPAK, ka pasur si qëllim manipulimin e dokumenteve për të fshehur detaje të transaksionit dhe burimet financiare të përdorura për blerjen e apartamentit.