Kryetari i lëvizjes Bashkë, Arlind Qori i është përgjigjur deklaratave të kryeministrit Rama i cili në dy daljet e fundit e ka etiketuar me emra të ndryshëm, dhe jo me emrin e tij.
I vënë në krye të protestës së pensionistëve, Arlind Qori thotë se lëvizja e tij e fundit ashtu si ajo e vitit 2018 kur ishte në krye të studentëve, ka frikësuar Edi Ramën.
Ai thotë se Rama në 2018 e etiketonte si një qorr që ishte në krye të protestës dhe sot që është me pensionistët e quan “sude me gjyslyke”.
Me tej Qori shprehet se Rama e ka të kotë, dhe se e gënjen mendja se do të fitojë.
Deklarata e Arlind Qorit
Dy herë është detyruar Edi Rama të më përmendë publikisht. Në të dyja rastet pa edukatën e të drejtuarit në emër, por i fiksuar në mënyrë perverse me aftësinë time për të shikuar.
Gjatë protestave studentore të dhjetorit 2018 më drejtohej “Është një qorr…”, duke zgjuar indinjatën e një studenti të verbër që kishte përballë.
Kurse sot më ka quajtur “Sude me gjyslyke”.
I digjte atëherë përfshirja ime mes studentëve, i përcëllon sot ndikimi im dhe i Lëvizjes BASHKË te pensionistët.
I gjori! Kujton se do të zgjidhet prapë kryeministër.