Për pak ditë shënohet 14 vjet nga ngjarja tragjike e 21 janarit, kur 4 protestues të opozitës u vranë nga plumbat e shtetit gjatë qeverisjes së Sali Berishës.
Dosja lidhur me këtë ngjarje është aktualisht në duar të SPAK, por analisti Arben Meçe e konsideron hetimin të vonuar.
Ai i bën apel Prokurorisë së Posaçme për të çuar përpara hetimet dhe thekson se kjo ngjarje kërkon përgjegjësi të qartë, pasi Gjykata e Strasburgut ka vlerësuar se ngjarja është një krim shtetëror.
Meçe e përmendi edhe vendimin e Strasburgut, i cili trajtoi dy pista: vrasjen shtetërore dhe përpjekjen për të fshehur provat. Ai e konsideron këtë përpjekje për manipulimin e provave si një akt më të rëndë, që tregon një qëllim të fshehtë pas vrasjes së protestuesve më 21 janar.
“Është apel që bëjmë, jemi për pak ditë në përvjetor. Unë kam thënë dhe do them, që në këtë ngjarje SPAK është i vonuar. Nëse sot duhet të bëj një apel, është: ‘I nderuar SPAK është një çështje që kërkon përgjegjësinë. Çështja është shumë e qartë tashmë. Strasburgu e trajtoi ngjarjen në dy pista dhe mori vendim në dy pista. Pista e dytë është me serioze, së pari thotë që është vrasje shtetërore dhe e dyta tentativa për të fshehur provat dhe manipuluar provat. Kjo është më e rëndë, tentativa për të fshehur provat fsheh në vetvete edhe qëllimin e vrasjes së 21 janarit”, tha Meçe.