Disa muaj pas anulimit të tenderit për tunelin e Llogarasë, Ministria e Infrastrukturës do të rishpallte përsëri tenderin me fond limit 18.9 miliardë lekë. Në garë kësaj radhe do të merrnin pjesë grupe kompanish. Pas studimit të dokumenteve të tenderit, Open Data Albania e shënoi me flamur të kuq. Kjo pasi më 8 tetor 2021, Ministria e Infrastrukturës do të s’kualifikonte të gjithë pjesëmarrësit, me përjashtim të konsorciumit të kompanive turke “INTEKAR YAPI TURIZM ELEKTRIK INSAAT” dhe “ASL INSAAT TAAHHUT”, të cilët u shpallën automatikisht fituese. Për këtë fakt foli edhe ish zv/kryeministri Arben Ahmetaj bëri në intervistën e dytë në “Çim Peka live” ku tha se Edi Rama dhe Belinda Balluku kanë kontribuar në avullimin e miliona eurove, që u zhdukën nga njëri tender në tjetrin, të organizuar për tunelin e Llogarasë.
Akuza
Ahmetaj pretendoi se fillimisht u zhvillua një tender i cili u fitua nga kompania shqiptare Gjoka Konstruction, me një vlerë 140 milionë euro. Por, pas gjashtë muajsh ky tender u ripërsërit, fitues i tij u shpall një bashkim firmash turke me 50 milionë euro më shumë. Ahmetaj këmbënguli se të gjitha punimet u bënë nga kompania Gjoka që fitoi tenderin e parë dhe se ai kishte prova se turqit nuk kishin sjellë asnjë makineri apo pajisje. “Shikoni kush ka qene në Ankara para tenderit të dytë dhe do ta kuptoni. Ekzistojnë foto nga këto takime”, këmbënguli ish zv kryeministri. Ai e konsideroi këtë aferë një korrupsion të pastër duke akuzuar SPAK-dhe kryeprokurorin Dumani se i ka mbyllur sytë përpara skandaleve ku dyshohet se është i implikuar kryeministri, njësoj si ato të Eko Parkut apo tenderave të AKSH. “Unë nuk jam 007, por nëse do Altin Dumani ja ku i ka faktet. I’u hoq tenderi Gjokës me presion, i cili ofroi 140 mln euro dhe u ritenderua 190 mln euro me kursin e sotëm dhe pas një procedure të parapërgatitur e morën turqit.
Datat
Së paku për datat, pretendimet e Ahmetajt janë lehtësisht të vërtetueshme. Tenderi i parë për tunelin e Llogarasë u zhvillua në dhjetor 2020. Por ai u anulua më pas me pretendimin zyrtar se “5 kompanitë që ishin në garë u s’kualifikuan për shkak se nuk plotësonin kriteret ligjore dhe teknike”. Një garë e dytë u hap në qershor 2021, ku shifra u rrit me 50 milionë euro. Atë e fitoi Bashkimi i kompanive turke. Edhe këtu pretendimet e ish zv kryeministrit përkojnë, pasi, para “fitores” të turqve Rama dhe Balluku kanë qenë për vizitë zyrtare në Ankara dhe ministrja e infrastrukturës ka botuar edhe status në Facebook për këtë ngjarje. Pas denoncimit tw Ahmejtat pwr Ballukun reagoi edhe ish-kryeministri Sali Berisha. Në rrjetet sociale ai publikoi një postim të ministres së Infrastrukturës Belinda Balluku, e cila mban datën 3 Qershor 2021 dhe shfaqet krah kryeministrit Edi Rama në Ankara dhe konfirmon takimet me kompanitë aty. “Produktiviteti i madh i takimit të Ramës dhe Ballukut në Turqi, fituan 50 milionë euro me tunelin e Llogarasë!”, shkruan Berisha krahas postimit të Ballukut.
Denoncimet e opozitës
Një javë pas shpallje së fituesit, dyshimet për korrupsion me këtë tender do të s’postoheshin në sallën e parlamentit, ku deputeti i Partisë Demokratike, Bujar Leskaj, do të shkëmbente replika me ministren e Infrastrukturës, Belinda Balluku. Deputeti i PD së Vlorës, Bujar Leskaj në parlament do të denonconte ofertën fillestare të tunelit të Llogarasë. “Ministria e Infrastrukturës, ministria e keqmenaxhimit, në garën për tunelin e Llogarasë zgjodhi ofertën me vlerë më të lartë, 170 milionë euro nga 158 që ishte e dyta. Me të drejtë edhe deputeti i Shkodrës, Helidon Bushati e denoncoi këtë fakt, duke akuzuar ministrinë se duke e paralajmëruar në emër të PD-së për kallëzimin penal për 12 milionë euro, që është diferenca e ofertës së shpallur fituese me atë që është me vlerë më të ulët”, do të deklaronte deputeti i PD, Bujar Leskaj nga foltorja e Parlamentit, duke shigjetuar ministren Balluku. Kjo e fundit nuk do t’i kursente replikat me ish-kreun e Kontrollit të Lartë të Shtetit, Leskaj, duke deklaruar se vlerësimi në këto tendera bëhej në bazë të pikëve. Por i gjithë sqarimi u bë pa dhënë informacione të tjera për tenderin e anuluar dhe kompanitë pjesëmarrëse. Bujar Leskaj, Helidon Bushati dhe Arbi Agalliu patën deklaruar se do ta kallëzonin çështjen në SPAK, por nuk u mor vesh nëse opozita e bëri ndonjëherë padinë.
